सेलू :ग्रामीण व होतकरू विद्यार्थ्यांसाठी गुणवत्तेचे प्रवेशद्वार मानल्या जाणाऱ्या नवोदय विद्यालयाच्या इयत्ता सहावी प्रवेशासाठी घेण्यात आलेली पूर्व परीक्षा शनिवारी (दि. १३) सेलू शहरातील तीन परीक्षा केंद्रांवर अत्यंत शांत, शिस्तबद्ध आणि पारदर्शक वातावरणात पार पडली. या परीक्षेला तालुक्यातून विद्यार्थ्यांचा उत्स्फूर्त प्रतिसाद लाभला असून तब्बल १ हजार २०१ विद्यार्थ्यांनी परीक्षा दिली.
या परीक्षेसाठी जिल्हा परिषद तसेच खासगी शाळांमधील एकूण १ हजार २५१ विद्यार्थ्यांनी अर्ज दाखल केले होते. त्यापैकी ५० विद्यार्थी अनुपस्थित राहिले.नूतन विद्यालय परीक्षा केंद्रावर ५५२ पैकी ५२६ विद्यार्थी, नूतन कन्या विद्यालय येथे ४५६ पैकी ४४० विद्यार्थी, तर न्यू हायस्कूल केंद्रावर २४३ पैकी २३५ विद्यार्थी परीक्षेस उपस्थित होते.
परीक्षेच्या यशस्वी व सुरळीत आयोजनासाठी प्रशासन सज्ज होते. गटविकास अधिकारी उदय जाधव, गटशिक्षणाधिकारी गजानन वाघमारे, पोलीस उपनिरीक्षक बलभिम राऊत, जनार्धन कदम आदी अधिकाऱ्यांनी परीक्षा केंद्रांना भेट देत पाहणी केली. नूतन विद्यालय परीक्षा केंद्रावर नवोदय विद्यालयाचे केंद्रीय दर्जा अधिकारी अविनाश साळुंके यांच्या देखरेखीखाली परीक्षा प्रमुख संतोष पाटील, विजेंद्र धापसे, गोपाल आमले, मुकुंद डमरे, डॉ. काशीनाथ पल्लेवाड, किरण देशपांडे यांनी जबाबदारी पार पाडली.
नूतन कन्या विद्यालय केंद्रावर निशा पाटील, भालचंद्र गांजापूरकर, तर न्यू हायस्कूल केंद्रावर मुख्याध्यापक धनंजय भागवत यांच्यासह शिक्षक व कर्मचाऱ्यांनी मोलाचे सहकार्य केले.
तीनही केंद्रांवर कोणताही अनुचित प्रकार न घडता, पूर्ण शिस्तीत व शांत वातावरणात परीक्षा यशस्वीरीत्या पार पडली.
✍🏻मुख्य संपादक – अशोक अंभोरे
