सेलू/ता. प्रतिनिधी
सेलू नगरपरिषदेतील कथित भ्रष्टाचाराच्या गंभीर प्रकरणाने शहरात प्रचंड असंतोष निर्माण झाला असून, प्रभारी मुख्याधिकारी तुकाराम कदम यांच्या गैरकारभाराविरोधात सामाजिक कार्यकर्ते श्रीनिवास उघडे यांनी उपविभागीय कार्यालयासमोर सुरू केलेले बेमुदत उपोषण दहा दिवस उलटूनही सुरूच आहे. मात्र, इतका कालावधी उलटूनही प्रशासन व पालकमंत्र्यांनी व लोकप्रतिनिधींकडून कोणतीही ठोस कारवाई किंवा स्पष्ट भूमिका न घेतल्याने आज मुंडन आंदोलन करावे लागले याप्रकरणी नागरिकांमध्ये संतापाची भावना तीव्र होत आहे.
उपोषणकर्ते श्रीनिवास उघडे यांनी आरोप केला आहे की, पाणीपट्टी, घरपट्टी व बांधकाम परवाना शुल्क आकारताना मोठ्या प्रमाणावर आर्थिक अफरातफर करण्यात आली आहे. तसेच नगरपरिषदेच्या मालकीच्या मौल्यवान भूखंडांचे भाडेतत्त्वावर वाटप करताना नियम डावलून मनमानी व भ्रष्ट पद्धतीने व्यवहार करण्यात आल्याचा गंभीर आरोप त्यांनी केला आहे.
विद्यानगर येथील माणिक हॉस्पिटलची जागा, बालवाडीची जागा, हासमुख कॉलनीतील हनुमान मंदिराची जागा, नगरपरिषदेच्या टाऊन हॉल लगतची जागा तसेच सर्वे क्रमांक १००, ९८, ९९, २२९, २५४ व २५५ या भूखंडांच्या वाटपात आर्थिक गैरव्यवहार झाल्याचा दावा करण्यात आला आहे.
या प्रकरणी उघडे यांनी यापूर्वी पालकमंत्री यांना निवेदन दिले होते. मात्र, अद्याप कोणतीही दखल न घेतल्याने पालकमंत्र्यांची या गैरव्यवहाराला मूक संमती आहे काय, असा थेट सवाल आता नागरिकांकडून उपस्थित केला जात आहे. उपविभागीय अधिकारी यांनाही सविस्तर निवेदन देऊनही चौकशी सुरू न झाल्याने प्रशासनाच्या भूमिकेवर संशय व्यक्त होत आहे.
न्याय मिळावा म्हणून बेमुदत उपोषणाचा मार्ग स्वीकारावा लागल्याचे उघडे यांनी सांगितले. उपोषणादरम्यान त्यांच्या प्रकृतीकडेही दुर्लक्ष होत असल्याचा आरोप असून, प्रशासनाने तातडीने हस्तक्षेप करून चौकशी समिती नेमावी व दोषींवर गुन्हे दाखल करावेत, अशी मागणी करण्यात येत आहे.दरम्यान, विविध सामाजिक संघटना, नागरिक व राजकीय कार्यकर्ते उपोषणाला जाहीर पाठिंबा देत असून, तात्काळ निर्णय न झाल्यास आंदोलन अधिक तीव्र करण्याचा इशारा उपोषणकर्त्यांनी दिला आहे. 
✍🏻मुख्य संपादक – अशोक अंभोरे
