सेलूत महाराणा प्रताप पुतळा जागेवर वाद; राखीव जागेवरील काम तात्काळ थांबविण्याची मागणी.
सेलू (जि. परभणी) : नगर परिषद सेलू हद्दीतील सर्वे क्रमांक 257 मधील महाराणा प्रताप यांच्या पुतळ्यासाठी राखीव ठेवण्यात आलेल्या जागेवर इतर विकासकाम सुरू असल्याचा आरोप करत स्थानिक नागरिक व नगरसेवकांनी तीव्र आक्षेप नोंदविला आहे. सदर काम तात्काळ थांबवून जागा मूळ उद्देशासाठी कायम राखून ठेवावी, अशी मागणी मुख्याधिकाऱ्यांकडे निवेदनाद्वारे करण्यात आली आहे.
निवेदनानुसार, नगर परिषदेकडून संबंधित जागा महाराणा प्रताप यांच्या पुतळ्यासाठी राखीव ठेवण्यात आली असून सन 2005 पासून त्या ठिकाणी दरवर्षी महाराणा प्रताप जयंती मोठ्या उत्साहात साजरी केली जात आहे. विकास आराखड्यात (Development Plan)ही याबाबत स्पष्ट नोंद असल्याची माहिती निवेदनात देण्यात आली आहे. मागील सुमारे वीस वर्षांपासून सातत्याने कार्यक्रम होत असल्याने त्या जागेशी नागरिकांचा भावनिक व ऐतिहासिक संबंध निर्माण झाला आहे.
मात्र अलीकडेच नगर परिषदेकडून त्या राखीव जागेवर अन्य प्रकारचे विकासकाम,बांधकाम सुरू करण्यात आल्याचे निदर्शनास आले आहे. विकास आराखड्यात विशिष्ट उद्देशासाठी राखीव असलेल्या जागेचा वापर बदलण्यासाठी शासनाची वैध परवानगी व नियमानुसार प्रक्रिया आवश्यक असते.
याबाबत कोणतीही सार्वजनिक सूचना, हरकती मागविण्याची प्रक्रिया किंवा नागरिकांशी चर्चा न झाल्याने पारदर्शकतेचा अभाव असल्याचा आरोप करण्यात आला आहे.
नागरिकांच्या भावना व श्रद्धेशी संबंधित विषय असल्याने नगर परिषदेकडून पूर्वी झालेल्या ठरावाच्या विरोधात कारवाई होणे हे सार्वजनिक विश्वासाला तडा देणारे असल्याचेही निवेदनात नमूद करण्यात आले आहे.
महाराणा प्रताप पुतळ्यासाठी राखीव असलेल्या जागेवरील इतर विकासकाम तात्काळ थांबविण्याचे आदेश द्यावेत,सदर जागेबाबतचा मूळ ठराव, विकास आराखड्याची प्रत व उद्देश बदलासंदर्भातील कोणतेही आदेश असल्यास त्याची प्रमाणित प्रत द्यावी नागरिक, सामाजिक संस्था व नगर परिषद प्रतिनिधी यांची संयुक्त बैठक तात्काळ बोलावून विषयावर सविस्तर चर्चा करावी,संबंधित जागा मूळ उद्देशासाठी कायम राखून ठेवून महाराणा प्रताप यांच्या पुतळ्याची उभारणी लवकरात लवकर करण्यात यावी.
याबाबत सकारात्मक कार्यवाही न झाल्यास जिल्हाधिकारी, विभागीय आयुक्त तसेच न्यायालयीन मार्गाचा अवलंब करण्याचा इशाराही देण्यात आला आहे.
निवेदनावर नगरसेवक कपिल फुलारी, प्रशांत ठाकूर, बंडू देवधर, पवनराजे घुमरे शिवसेना प्रमुख,कृष्णा चव्हाण भारतीय जनता पार्टी ओबीसी प्रमुख, व्यंकटेश भिसे, संजय भाग्यवंत, सुनील चव्हाण, राजू चव्हाण, शिवशंकर राऊत, अर्जुन चव्हाण, अर्जुन बाविशे, बालाजी वडे, राहुल जाधव, कान्हा शर्मा आदींच्या सह्या आहेत.
✍🏻मुख्य संपादक – अशोक अंभोरे
