सेलू / प्रतिनिधी
सेलू शहरात उघडकीस आलेल्या धक्कादायक प्रकरणाने नगरपालिकेच्या कारभारावर गंभीर प्रश्नचिन्ह निर्माण केले आहे. विद्यानगर लेक्चर कॉलनी येथील नारायण गंगाराम चिक्याल यांच्या मालकीचा प्लॉट क्रमांक ७/१३, साईज ६० x ३० असलेला भूखंड बनावट खरेदीखताच्या आधारे शिवप्रसाद आसाराम सानप यांच्या नावावर करण्यात आल्याचे अधिकृत नोंदींच्या पडताळणीतून स्पष्ट झाले आहे. विशेष म्हणजे, ज्या दस्ताच्या आधारे नामांतर मंजूर झाले तो दस्त क्रमांक प्रत्यक्षात सेलू तालुक्यातील हातनुर येथील दुसऱ्याच व्यक्तीच्या नावावर असल्याची धक्कादायक बाब समोर आली आहे.
२०१३ सालातील कथित व्यवहाराची कागदपत्रे तब्बल १२ वर्षे प्रकाशझोतात आली नव्हती. ती अचानक डिसेंबर २०२५ मध्ये नामांतरणासाठी सादर होतात आणि त्यावर नगरपालिकेचा अधिकृत शिक्काही बसतो. इतकी वर्षे ही फाईल नेमकी कुठे होती? कोणाच्या संरक्षणाखाली ती दडवली गेली? आणि योग्य वेळ साधूनच ती पुढे आणण्यात आली का? असे अनेक संतप्त प्रश्न आता सेलूकर विचारत आहेत.
रजिस्ट्री कार्यालयातील नोंदी तपासल्या असता दस्त क्रमांकातील विसंगती स्पष्ट झाली आहे. अशा परिस्थितीत कागदपत्रांची पडताळणी न करता नामांतर कसे मंजूर झाले? हा केवळ निष्काळजीपणा आहे की संगनमत करून भ्रष्टाचाराचा अवलंब करण्यात आला? नगरपालिकेतील संबंधित कर्मचारी व अधिकाऱ्यांची भूमिका तपासली जाणे आवश्यक असल्याची मागणी होत आहे.
प्रकरण उघडकीस येऊनही अद्याप ठोस कारवाई झालेली नाही. निलंबन किंवा गुन्हा दाखल करण्याबाबत प्रशासन मौन बाळगत असल्याने संशय अधिक गडद होत आहे.
पालकमंत्र्यांनी लक्ष्य घालण्याची मागणी. शहरातच असा प्रकार घडल्याने त्यांनी स्वतः हस्तक्षेप करून संबंधित व्यक्ती तसेच सामील कर्मचारी व अधिकाऱ्यांवर कठोर कारवाई करावी, अशी मागणी नागरिकांकडून व्यक्त केल्या जात आहे.
आता या प्रकरणाची निष्पक्ष चौकशी होऊन दोषींवर कायदेशीर कारवाई होते का, की हा विषयही दडपला जातो. याकडे संपूर्ण सेलू शहराचे लक्ष लागले आहे.
✍🏻मुख्य संपादक – अशोक अंभोरे
