सेलू (प्रतिनिधी): बनावट कागदपत्रे, बनावट सही आणि शिक्क्यांचा वापर करून अख्खी बनावट रजिस्ट्रीचा वापरकरून नगर परिषदेची आणि मूळ मालकाची फसवणूक केल्याप्रकरणी जिंतूर येथील एका आरोपीविरुद्ध सेलू पोलीस ठाण्यात गुन्हा दाखल करण्यात आला आहे. या धक्कादायक प्रकारामुळे शहर परिसरात खळबळ उडाली आहे.
पोलिसाकडून मिळालेल्या माहितीनुसार, नारायण गंगाधर चिक्याळ (रा. विद्यानगर, सेलू) यांच्या मालकीची मालमत्ता क्र. ७/२०२३ ही सेलू शहरात आहे. या मालमत्तेचे बनावट खरेदीखत तयार करून ती हडपण्याचा प्रयत्न आरोपी शिवप्रसाद आसाराम सानप (रा. जिंतूर) याने केला. आरोपीने २०१३ सालचे एक बनावट खरेदीखत (दस्त क्र. १०९१/२०१३) तयार केले. विशेष म्हणजे, यावर नोटरींची बनावट सही, शिक्का तसेच दुय्यम निबंधक कार्यालय, सेलू यांचे बनावट शिक्के मारून ते दस्तऐवज खरे असल्याचे भासवले.नगर परिषदेचीही केली फसवणूक केली.
आरोपीने ही बनावट कागदपत्रे २६ डिसेंबर २०२५ रोजी सेलू नगर परिषदेत सादर केली. स्वतःच्या फायद्यासाठी ही मालमत्ता आपल्या नावावर करून घेण्यासाठी त्याने फाईल क्र. ६२१/७/२०२५ अन्वये अर्ज केला होता. याद्वारे त्याने मूळ मालक आणि शासन अशा दोन्ही पक्षांची मोठी फसवणूक केली.
या प्रकरणी सेलू नगर परिषदेचे कर व प्रशासकीय अधिकारी मोहम्मद युनुस मोहम्मद सैफुल हक्क (वय ५१ वर्षे) यांनी फिर्याद दिली आहे. त्यांच्या तक्रारीवरून आरोपी शिवप्रसाद सानप विरुद्ध सेलू पोलीस ठाण्यात गुन्हा रजि. नं. २०९/२०२६, कलम ३१८(४), ३३६(२), ३४०(२) बीएनएस (BNS) नुसार गुन्हा दाखल करण्यात आला आहे.पोलीस निरीक्षक दिपक बोरसे यांच्या मार्गदर्शनाखाली पोलीस उपनिरीक्षक शेख या प्रकरणाचा पुढील तपास करत आहेत.
या रॅकेटमध्ये आणखी कोणाचे हात गुंतले आहेत का? गुन्हा घडवून बरेच दिवस झाले, नगर परिषदेने उशिरा गुन्हा का केला. असा प्रश्न उपस्थित होत आहे. या प्रकरणात सानप एकटाच आहे की आणखी किती आरोपी आहेत याचा पोलिसांनी कोणाच्याही दबावाला बळी न पडता शोध घ्यावा नि:पक्षपाती चौकशी करून, संबंधितावर गुन्हे दाखल करावेत. अशी मागणी सेलूच्या नागरिकाकडून व्यक्त होत आहे.
✍🏻मुख्य संपादक – अशोक अंभोरे
