सेलू (प्रतिनिधी) – शहरातील एका शाळेत शिक्षण घेत असलेल्या १६ वर्षीय विद्यार्थिनीने सततच्या छेडछाड आणि पाठलागाच्या त्रासाला कंटाळून आत्महत्या केल्याची धक्कादायक घटना १७ एप्रिल रोजी दुपारी १.३० ते १.४५ वाजण्याच्या सुमारास देऊळगावगात (ता. सेलू, जि. परभणी) येथे घडली. या घटनेमुळे परिसरात हळहळ व्यक्त होत असून नागरिकांमध्ये संतापाची लाट उसळली आहे.
या प्रकरणी सेलू पोलीस ठाण्यात फिर्यादी (वय ४२, रा. पाथरी रोड, तहसील कॉर्नर, सेलू) यांच्या तक्रारीवरून कैलास विजय लोंडे (रा. अर्जुन नगर, सेलू) व एका अनोळखी इसमाविरुद्ध गुन्हा क्रमांक २०४/२०२६ अन्वये भारतीय न्याय संहिता (BNS 2023) कलम १०८, ३५२, ३५१(२)(३), ३(५), ७८ तसेच पोक्सो कायदा कलम १२ अंतर्गत गुन्हा दाखल करण्यात आला आहे.
मिळालेल्या माहितीनुसार, संबंधित आरोपी मागील तीन महिन्यांपासून पीडित मुलीचा शाळेत येताना-जाता पाठलाग करून वारंवार त्रास देत होता. तसेच फिर्यादीच्या मुलाला शिवीगाळ करून जिवे मारण्याच्या धमक्या देण्यात आल्याचेही तक्रारीत नमूद आहे. सततच्या मानसिक छळाला आणि भीतीला कंटाळून मुलीने घरात गळफास घेऊन आत्महत्या केल्याचे समोर आले आहे.
घटनेची माहिती मिळताच उपविभागीय पोलिस अधिकारी वाघमारे, पोलीस निरीक्षक दीपक बोरसे, तसेच सहाय्यक पोलीस अधिकारी श्रीमती पुंगळे यांनी घटनास्थळी भेट देऊन पाहणी केली. पोलीस निरीक्षक दीपक बोरसे यांच्या मार्गदर्शनाखाली गुन्हा दाखल करण्यात आला असून पुढील तपास श्रीमती पुंगळे करत आहेत.
दरम्यान, या घटनेमुळे पालकांमध्ये भीतीचे वातावरण निर्माण झाले असून विद्यार्थिनींच्या सुरक्षिततेबाबत गंभीर प्रश्न उपस्थित झाले आहेत. आरोपींवर कठोर कारवाईची मागणी नागरिकांकडून जोर धरत आहे..
✍🏻मुख्य संपादक – अशोक अंभोरे
