हुंड्याच्या ५ लाखांच्या मागणीसाठी विवाहितेचा छळ; पतीसह तिघांविरुद्ध गुन्हा
सेलू (जि. परभणी) – माहेरून ५ लाख रुपये आणण्यासाठी विवाहितेचा शारीरिक व मानसिक छळ करून मारहाण केल्याची धक्कादायक घटना उघडकीस आली आहे. या प्रकरणी सेलू पोलीस ठाण्यात पतीसह तिघांविरुद्ध भारतीय न्याय संहितेच्या विविध कलमान्वये गुन्हा दाखल करण्यात आला आहे.
पोलिसांकडून मिळालेल्या माहितीनुसार, पूजा आशिष खैरे (वय २२, रा. दत्तनगर, सेलू) हिचा विवाह आशिष रमन खैरे याच्याशी झाला होता. लग्नानंतर १ जून २०२५ पासून बीड येथील सहयोग नगर परिसरातील भाड्याच्या घरात वास्तव्यास असताना, आरोपींनी संगनमत करून तिला त्रास देण्यास सुरुवात केली.
“आमचे कर्ज फेडायचे आहे, तू माहेरून ५ लाख रुपये घेऊन ये,” अशी मागणी करत पती आशिष खैरे याने वारंवार शिवीगाळ करत लाथाबुक्क्यांनी मारहाण केली. याशिवाय दीर अजय रमन खैरे आणि जाऊ निता अजय खैरे यांनीही शिवीगाळ करत जीवे मारण्याची धमकी दिल्याचे फिर्यादीत नमूद आहे.
सततच्या अत्याचाराला कंटाळून अखेर पीडित महिलेनं सेलू पोलीस ठाण्यात धाव घेत तक्रार दाखल केली. पोलिसांनी तक्रारीची दखल घेत आरोपींविरुद्ध गुन्हा नोंदवला असून पुढील तपास सुरू आहे.
पोलीस निरीक्षक बोरसे यांच्या मार्गदर्शनाखाली पोलीस हवालदार जानगर हे अधिक तपास करत आहेत.
✍🏻मुख्य संपादक – अशोक अंभोरे
