सेलू (प्रतिनिधी) परभणी जिल्ह्यातील सेलू शहरात सायबर गुन्हेगारांनी अत्यंत चलाखीने निवृत्त शिक्षकाला जाळ्यात अडकवत तब्बल 97 लाख 83 हजार रुपयांची फसवणूक केल्याची धक्कादायक घटना उघडकीस आली आहे. या प्रकरणी सेलू पोलीस ठाण्यात गुन्हा दाखल करण्यात आला असून पोलिसांकडून सखोल तपास सुरू आहे.पोलिसांनी दिलेल्या माहितीनुसार , फिर्यादी नागनाथ शंकरराव कुरमुडले (वय 70), राहणार मौलाना आझाद नगर, सेलू हे सेवा निवृत्त शिक्षक आहेत. आरोपींनी त्यांना विविध मोबाईल क्रमांकांवरून संपर्क साधत अटक करण्याची धमकी दिली. तसेच त्यांच्या आधार कार्डाचा गैरवापर करून मुंबईत सिम कार्ड, पॅनकार्ड व बँक खाते उघडून कोट्यवधींचा गैरव्यवहार केल्याचा खोटा आरोप करत त्यांना भीतीच्या छायेत ठेवले.
या भीतीचा फायदा घेत आरोपींनी फिर्यादीकडून त्यांच्या पोस्टातील एफडी तोडून, पेन्शन लोन काढून, तसेच पत्नीचे सोन्याचे दागिने गहाण ठेवून कर्ज काढायला भाग पाडले. विविध बँक खात्यांवर RTGS व चेकद्वारे पैसे पाठवण्यास भाग पाडत आरोपींनी एकूण 97.83 लाख रुपये उकळले.
विशेष म्हणजे, आरोपींनी फिर्यादीला धमकी देत “ही बाब कोणाला सांगितल्यास पेन्शन बंद करू व मुलाची नोकरी घालवू” अशीही भीती दाखवली होती. त्यामुळे काही काळ ही बाब गुप्त ठेवण्यात आली होती.
या प्रकरणी 11 एप्रिल 2026 रोजी सायंकाळी गुन्हा दाखल करण्यात आला असून, भारतीय न्याय संहिता (BNS) तसेच माहिती तंत्रज्ञान कायद्यांतर्गत गुन्हा नोंदविण्यात आला आहे.सदर गुन्हा सपोनि पुंगळे मॅडम यांनी दाखल केला असून, पुढील तपास पोलीस निरीक्षक दीपक बोरसे करत आहेत.
पोलीस प्रशासनाने नागरिकांना आवाहन केले आहे की, अशा प्रकारच्या धमकी किंवा आमिषांना बळी पडू नये. कोणत्याही अनोळखी कॉलवर वैयक्तिक माहिती किंवा आर्थिक व्यवहार करू नयेत.
✍🏻मुख्य संपादक – अशोक अंभोरे
