सेलू प्रतिनिधी
शहरातील कायदा व सुव्यवस्था अधिक भक्कम करण्याच्या उद्देशाने सेलू पोलिसांनी मागील दोन दिवसांत विशेष मोहीम राबवत जुगार, अवैध दारू विक्री तसेच सार्वजनिक वाहतुकीस अडथळा ठरणाऱ्या वाहनधारकांवर धडक कारवाई केली. या मोहिमेत एकूण ६ स्वतंत्र गुन्हे दाखल करण्यात येऊन आरोपींना मुद्देमालासह ताब्यात घेण्यात आले आहे.
पोलीस निरीक्षक दीपक बोरसे यांच्या मार्गदर्शनाखाली शहरातील विविध भागांत छापे टाकून अवैध धंद्यांचे कंबरडे मोडण्यात आले.मटका जुगारावर तीन ठिकाणी छापे, शहरातील शिवाजी नगर, वालूर बसस्थानक व आठवडी बाजार परिसरात मटका जुगार सुरू असल्याची माहिती मिळताच पोलिसांनी तात्काळ कारवाई केली.
शिवाजी नगर येथे सचिन धोंडीभाऊ पानझडे (वय ३५) याला कल्याण मटका खेळवताना ९२० रुपये रोकडसह अटक करण्यात आली,वालूर बसस्थानक परिसरात रामभाऊ कृष्णाजी पाथरकर (वय ५८) याला ८३० रुपयांच्या मुद्देमालासह ताब्यात घेण्यात आले,वालूर आठवडी बाजार येथे ओम दिगंबर वावरे (वय ३२) याला ९१० रुपये रोकड व जुगार साहित्यासह रंगेहाथ पकडण्यात आले.
विनापरवाना देशी दारूची विक्री पकडली डॉ. झाकेर हुसेन नगर परिसरातील नाल्याजवळ सापळा रचून रामेश्वर सदाशिव पवार (वय ३५) याला अटक करण्यात आली. त्याच्याकडून ‘भिंगरी संत्रा’ देशी दारूच्या १२ सीलबंद बाटल्या (किंमत अंदाजे ९६० रुपये) जप्त करण्यात आल्या. सदर दारू चोरट्या विक्रीसाठी साठवण्यात आल्याचे तपासात निष्पन्न झाले आहे. तसेच वाहतुकीस अडथळा ठरणाऱ्यांवर गुन्हे सार्वजनिक रस्त्यांवर बेशिस्तपणे वाहने उभी करून अपघाताचा धोका निर्माण करणाऱ्या वाहनधारकांवरही भारतीय न्याय संहिता (BNS) अंतर्गत कारवाई करण्यात आली.क्रांती चौक येथे स्कॉर्पिओ (MH 21 CG 9555) रस्त्यात उभी केल्याप्रकरणी बालासाहेब टकले (रा. मंठा) यांच्यावर गुन्हा दाखल करण्यात आला त्याच ठिकाणी बलेनो कार (MH 20 GE 1293) रस्त्यावर उभी केल्याप्रकरणी नागेश डोंबे यांच्यावर कारवाई. तर जिंतूर नाका येथे मॅक्स जीप (MH 22 4332) वाहतुकीस अडथळा ठरेल अशा पद्धतीने उभी केल्याने चालक गणेश साहेबराव चिखले याच्यावर गुन्हा दाखल झाल्याची नोंद.
या सर्व प्रकरणांचा पुढील तपास पोलीस हवालदार शेख उस्मान, गरूड, राठोड व मुलगीर हे करीत आहेत. पोलिसांच्या या धडाकेबाज कारवाईमुळे शहरातील अवैध धंदेवाल्यांमध्ये मोठी खळबळ उडाली थेट कारवाई केली.
✍🏻मुख्य संपादक – अशोक अंभोरे
