गोवंश कत्तलीवर कारवाई दरम्यान पोलिसांवर दगडफेक ५ आरोपी ताब्यात, परिसरात तणाव.
सेलू (प्रतिनिधी)
शहरातील रेहमान नगर परिसरात रविवारी (दि. 29 मार्च 2026) सकाळी घडलेल्या गंभीर घटनेमुळे काही काळ तणावाचे वातावरण निर्माण झाले. गोवंश कत्तलीच्या संशयावरून कारवाई करण्यासाठी गेलेल्या पोलिस पथकावर जमावाने दगडफेक करून शासकीय कामात अडथळा निर्माण केल्याची धक्कादायक घटना समोर आली आहे.
पोलीस सूत्रांनी दिलेल्या माहितीनुसार, सकाळी सुमारे 8.15 वाजता नाल्यालगत असलेल्या पत्र्याच्या शेडमध्ये बेकायदेशीररित्या गोवंश कत्तल सुरू असल्याची माहिती मिळाल्यानंतर पोलीस पथकाने छापा टाकला. या कारवाई दरम्यान आरोपींनी अचानक जमाव गोळा करून पोलिसांवर दगडफेक केली. त्यामुळे काही काळ परिसरात भीती आणि गोंधळाचे वातावरण निर्माण झाले.
या प्रकरणी सहायक पोलीस निरीक्षक कृष्णा घायवट यांच्या फिर्यादीवरून विविध गंभीर कलमांखाली गुन्हा दाखल करण्यात आला आहे. पोलिसांनी घटनास्थळावरून अंदाजे 100 किलो गोवंश मांस, कातडी, मुंडके तसेच कत्तलीसाठी वापरण्यात येणारी शस्त्रे जप्त करण्याचा प्रयत्न केला असता, जमावाने ते साहित्य पळवून नेत पुरावे नष्ट केल्याचा आरोप आहे.
या घटनेत रज्जाक कुरेशी, मालजी कुरेशी, मोबीन उर्फ गठुळा कुरेशी, जावेद कुरेशी, सादिक कुरेशी यांच्यासह 15 ते 20 अज्ञात व्यक्तींविरोधात गुन्हा दाखल करण्यात आला आहे. आतापर्यंत 5 आरोपींना पोलिसांनी ताब्यात घेतले असून इतरांचा शोध सुरू आहे.
या घटनेनंतर काही काळ सेलूमध्ये तणावाचे वातावरण निर्माण झाले होते. मात्र पोलिसांनी तात्काळ परिस्थिती नियंत्रणात आणत परिसरात बंदोबस्त वाढवला आहे.
सदर गुन्ह्याचा पुढील तपास पोलीस उपनिरीक्षक शाकीर शेख करीत असून, या प्रकरणात आणखी आरोपींची अटक होण्याची शक्यता वर्तवली जात आहे.
कायदा हातात घेणाऱ्यांवर कठोर कारवाई होणार असल्याचा इशारा पोलिसांनी दिला.
✍🏻मुख्य संपादक – अशोक अंभोरे
