सेलू प्रतिनिधी
सेलू तालुक्यातील अत्यंत महत्त्वाच्या बस स्थानकावर तात्काळ सीसीटीव्ही कॅमेरे बसविण्यात यावेत, अन्यथा येत्या पंधरा दिवसांत ठिय्या आंदोलन छेडण्यात येईल, असा इशारा श्री व्यंकटेश्वर प्रतिष्ठान, सेलू यांच्या वतीने देण्यात आला आहे.
या संदर्भात आज परभणी येथील विभाग नियंत्रक यांच्या नावे निवेदन देण्यात आले. निवेदनात नमूद करण्यात आले आहे की, सेलू बस स्थानकावरून दररोज हजारो प्रवासी प्रवास करतात. मात्र, सद्यस्थितीत या बस स्थानकावर लहान-मोठ्या चोरीच्या घटनांमध्ये लक्षणीय वाढ झाली असून अनेक प्रवाशांचे दागिने व रोख रक्कम चोरीस गेल्याच्या घटना घडल्या आहेत.
या बस स्थानकावरून विद्यार्थी मोठ्या संख्येने दररोज ये-जा करतात, त्यामुळे त्यांच्या सुरक्षिततेचा प्रश्नही गंभीर बनला आहे. परभणी जिल्ह्यातील बहुतांश बस स्थानकांवर सीसीटीव्ही कॅमेरे कार्यान्वित असताना, फक्त सेलू बस स्थानकावरच अद्याप अशी कोणतीही व्यवस्था नसणे हे दुर्दैवी असल्याचे प्रतिष्ठानच्या वतीने स्पष्ट करण्यात आले आहे.
चोऱ्या चपाट्यांच्या घटनांमुळे होणारे आर्थिक नुकसान आणि प्रवाशांमध्ये निर्माण होणारी भीती दूर करण्यासाठी तात्काळ सीसीटीव्ही कॅमेरे बसविणे आवश्यक असल्याची ठाम भूमिका मांडण्यात आली. मागणीची दखल न घेतल्यास येत्या पंधरा दिवसांत सेलू बस स्थानकावर ठिय्या आंदोलन करण्यात येईल, याची नोंद घ्यावी, असेही निवेदनात नमूद आहे.
यावेळी जयसिंग शेळके, विनोद धापसे, गणेश शेवाळे, नवनाथ गायकवाड, समर्थ झमकडे, संजय जाधव, प्रशांत कटारे आदी पदाधिकारी व कार्यकर्ते उपस्थित होते.
✍🏻मुख्य संपादक – अशोक अंभोरे
