परभणी | प्रतिनिधी
छत्रपती संभाजीनगर विभागीय महसूल क्रीडा व सांस्कृतिक स्पर्धेदरम्यान शुक्रवारी (दि. ३ एप्रिल २०२६) परभणी येथे सांस्कृतिक कार्यक्रमांची रंगतदार मेजवानी पाहायला मिळाली. विविध विभागांतून सहभागी झालेल्या अधिकारी व कर्मचाऱ्यांनी आपल्या कलागुणांचे प्रभावी सादरीकरण करत उपस्थितांची मने जिंकली.
या स्पर्धेत सेलू येथील उपविभागीय दंडाधिकारी शैलेश लाहोटी यांनी विशेष आकर्षण ठरवत “M Office” या रंगमंचीय नाट्यप्रकारात दमदार भूमिका साकारली. वसंतराव नाईक कृषी विद्यापीठ येथे सादर करण्यात आलेल्या या नाट्यप्रयोगाने प्रेक्षकांची उत्स्फूर्त दाद मिळवली.
शैलेश लाहोटी यांच्या अभिनयातील नैसर्गिकता, संवादफेक आणि रंगमंचावरील आत्मविश्वास यामुळे कार्यक्रमस्थळी उत्साह आणि जल्लोषाचे वातावरण निर्माण झाले. महसूल विभागातील अधिकारी केवळ प्रशासकीय कामातच नव्हे, तर सांस्कृतिक क्षेत्रातही आपली छाप उमटवत असल्याचे यावेळी प्रकर्षाने जाणवले.
या स्पर्धांमुळे अधिकारी व कर्मचाऱ्यांमधील एकोपा वाढण्यासोबतच त्यांच्या सुप्त कलागुणांना वाव मिळत असल्याची भावना उपस्थितांनी व्यक्त केली
✍🏻मुख्य संपादक – अशोक अंभोरे
