सेलू (जि. परभणी) प्रतिनिधी
सेलू नगरपरिषद हद्दीतील सर्वे क्रमांक 25/1 मधील शेतजमिनीच्या प्रकरणात खोट्या कागदपत्रांच्या आधारे नामांतर करून पीटीआर देण्यात आल्याचा गंभीर आरोप समोर आला आहे. या प्रकरणात संबंधित नगरपरिषद कर्मचाऱ्यांनी भूमाफियांसोबत संगनमत केल्याचा आरोप तक्रारदारांनी केला असून, जिल्हाधिकारी कार्यालयाकडे अधिकृत तक्रार दाखल करण्यात आली आहे.
तक्रारदार शेख मुश्ताक शेख अब्दुल रज्जाक (माजी उपनगराध्यक्ष, सेलू) यांनी दिलेल्या माहितीनुसार, संबंधित जमीन ही मूळतः शेख सादेक शेख रहमान यांच्या मालकीची असून, त्या ठिकाणी नागरिकांच्या सोयीसाठी सुमारे 1975 साली नगरपरिषदेमार्फत सार्वजनिक शौचालय उभारण्यात आले होते. मात्र, काही भूमाफियांनी व नगरपरिषद कार्यालयातील कर्मचाऱ्यांनी संगनमत करून या जागेवर खोट्या कागदपत्रांच्या आधारे बोगस नामांतर केल्याचा आरोप करण्यात आला आहे.
तक्रारीत नमूद केल्याप्रमाणे, संबंधित भूमाफियांनी सर्वे क्रमांकात फेरफार करून बनावट बॉण्ड तयार केला व त्यावर जमीनमालकाची खोटी सही करून कागदपत्रे सादर केली. या कागदपत्रांच्या आधारे नगरपरिषद कर्मचाऱ्यांनी कोणतीही वरिष्ठ परवानगी न घेता नामांतर प्रक्रिया पूर्ण करून पीटीआर जारी केला असल्याचे सांगण्यात आले आहे.
या संपूर्ण प्रकरणात नगरपरिषद कार्यालयातील काही कर्मचाऱ्यांची भूमिका संशयास्पद असल्याचे तक्रारीत नमूद करण्यात आले असून, संबंधित दोषींवर तात्काळ निलंबनाची कारवाई करून फौजदारी गुन्हा दाखल करण्याची मागणी करण्यात आली आहे.
तक्रार जिल्हाधिकारी, परभणी तसेच नगरपालिका प्रशासन विभागाकडे सादर करण्यात आली असून, या प्रकरणाची सखोल चौकशी करून दोषींवर कठोर कारवाई होईल का, याकडे नागरिकांचे लक्ष लागले आहे.
✍🏻मुख्य संपादक – अशोक अंभोरे
