सेलू (प्रतिनिधी) – तालुक्यातील हळद उत्पादक शेतकऱ्यांसाठी दिलासादायक निर्णय घेत, सेलू कृषी उत्पन्न बाजार समितीत लवकरच हळद बीट (Turmeric Auction) सुरू करण्याच्या हालचाली वेगाने सुरू झाल्या आहेत. यासंदर्भात सकारात्मक चर्चा पूर्णत्वाकडे जात असून, अंतिम निर्णय लवकरच अपेक्षित आहे.
सध्या हळद विक्रीसाठी शेतकऱ्यांना इतर बाजारपेठांचा आधार घ्यावा लागत असल्याने वाहतूक खर्च, वेळेचा अपव्यय आणि दरातील अनिश्चितता यांचा मोठा फटका बसत होता. मात्र, स्थानिक स्तरावरच हळद विक्रीची सुविधा उपलब्ध झाल्यास शेतकऱ्यांचा खर्च कमी होऊन त्यांना अधिक स्पर्धात्मक व योग्य दर मिळण्याची शक्यता निर्माण झाली आहे.
यापूर्वी सेलू बाजार समितीत कापसाला मिळालेल्या चांगल्या दरांमुळे शेतकऱ्यांचा विश्वास वाढला असून, त्याच धर्तीवर हळद बीट सुरू झाल्यास बाजारपेठ अधिक सक्षम आणि गतिमान होईल, असा विश्वास व्यक्त केला जात आहे.
या उपक्रमासाठी बाजार समितीचे सभापती डॉ. संजय रोडगे यांच्या नेतृत्वाखाली संचालक मंडळ सक्रियपणे प्रयत्न करत आहे. तसेच व्यापारी बांधवांना हळद खरेदी प्रक्रियेत सहभागी होण्यासाठी लवकरात लवकर नोंदणी करण्याचे आवाहन करण्यात आले आहे.
शेतकरी व व्यापाऱ्यांच्या सहकार्याने हा उपक्रम यशस्वी ठरेल आणि सेलू तालुका हळद व्यापारात नवे केंद्र म्हणून उदयास येईल, असा विश्वास सभापती डॉ. संजय रोडगे यांनी व्यक्त केला..
✍🏻मुख्य संपादक – अशोक अंभोरे
