सेलू–जिंतूरमध्ये अवैध रेती वाहतुकीवर कारवाईची.
उपविभागीय अधिकारी शैलेश लाहोटी यांची सकाळीच धडक मोहीम;
दोन वाहने जप्त.
सेलू, दि. 25 (प्रतिनिधी)
महसूल प्रशासनाने अवैध रेती वाहतुकीविरोधात पुन्हा एकदा कठोर भूमिका घेत सकाळीच धडक कारवाई केली. सेलू येथील वालूर नाका परिसरात सकाळी 8.00 वाजता उपविभागीय अधिकारी शैलेश लाहोटी यांनी स्वतः उपस्थित राहून अवैध रेती वाहतूक करणारे ट्रॅक्टर (क्र. MH-22 X-0646) पकडले. संबंधित ट्रॅक्टर हा राजवाडी येथील डिंगाबर प्रभाकर काष्टे यांच्या मालकीचा असून तो विनापरवाना रेती वाहतूक करीत असल्याचे आढळून आले.
सदर वाहन तहसील कार्यालय, सेलू येथे जप्त करण्यात आले आहे.
याच दिवशी जिंतूर तालुक्यातील मौजे शेवडी येथेही महसूल पथकाने कारवाई करत हायवा (क्र. MH-22 AM-6112) अडवला. वाहनात अंदाजे ५ ब्रास रेती विनापावती आढळून आली. नियमांचे उल्लंघन केल्यामुळे संबंधित वाहन तहसील कार्यालयात लावण्यात आले आहे.
ही संपूर्ण कारवाई ग्राम महसूल अधिकारी श्री. गावंडे यांनी उपविभागीय अधिकारी शैलेश लाहोटी यांच्या मार्गदर्शनाखाली केली. प्रशासनाच्या या कारवाईमुळे अवैध रेती माफियांमध्ये खळबळ उडाली असून महसूल विभाग पुढील काळातही अशीच कडक भूमिका कायम ठेवणार असल्याचे संकेत मिळत आहेत.
- दरम्यान, परिसरातील नागरिकांनी प्रशासनाच्या या धडक कारवाईचे स्वागत केले असून अवैध उत्खनन व वाहतुकीवर कायमस्वरूपी लगाम लावण्याची मागणी व्यक्त केली आहे.
✍🏻मुख्य संपादक – अशोक अंभोरे
