सेलू : सेलू शहरासह तालुक्यात सेलू कोणत्याही दुकानावर नायलॉन मांजाची विक्री व वापर केल्यास संबंधितांवर कठोर कारवाई करण्यात येणार असल्याचा इशारा सेलू पोलीस ठाण्याचे पोलीस निरीक्षक दीपक बोरसे यांनी दिला आहे.
नायलॉन मांजामुळे नागरिक, दुचाकीस्वार, पक्षी तसेच जनावरांना गंभीर दुखापत होण्याच्या घटना वाढत असल्याच्या पार्श्वभूमीवर ही कारवाई हाती घेण्यात आली आहे.
या अनुषंगाने आज सेलू शहरात पोलीस उपनिरीक्षक बलभीम राऊत, हेड कॉन्स्टेबल तेलंग व पोलीस कर्मचारी पुलाते यांच्या पथकाने शहरातील विविध भागांतील पतंग व इतर साहित्य विक्री करणाऱ्या दुकानांची झडती सुरू केली आहे. झडतीदरम्यान नायलॉन मांजा आढळून आल्यास तो जप्त करून संबंधित विक्रेत्यांवर कायदेशीर कारवाई करण्यात येणार असल्याचे पोलिसांकडून सांगण्यात आले.
नायलॉन मांजाचा वापर हा कायद्याने प्रतिबंधित असून तो मानवी जीवितास तसेच पर्यावरणासाठी अत्यंत धोकादायक आहे. त्यामुळे नागरिकांनी कागदी अथवा सुती मांजाच वापरावा, तसेच नायलॉन मांजाची खरेदी, विक्री व वापर टाळावा, असे आवाहन पोलिसांनी केले आहे.
या विषयावर व्यापक जनजागृती होण्यासाठी नागरिकांमध्ये जागरूकता निर्माण करावी, अशी विनंती पोलीस प्रशासनाच्या वतीने करण्यात आली आहे. नायलॉन मांजाविरोधातील ही मोहीम पुढील काळातही सातत्याने राबविण्यात येणार असल्याचे पोलीस निरीक्षक दीपक बोरसे यांनी स्पष्ट केले आहे.
✍🏻मुख्य संपादक – अशोक अंभोरे
